Noyabrın 23-dən 25-dək Bakıda Səhiyyə Nazirliyinin Milli Onkologiya Mərkəzi, Elmi Cərrahiyyə Mərkəzi və Mamalıq-Ginekologiya İnstitutunun dəstəyi, Azərbaycan-Almaniya Tibbi Əməkdaşlıq Cəmiyyətinin təşkilatçılığı ilə IV Bakı Beynəlxalq Tibbi Treninq Günləri keçirilib.

   Azərbaycanla yanaşı Türkiyə, Rusiya, Ukrayna, Almaniya və Özbəkistandan  300 iştirakçının qatıldığı tədbirin ilk günündə dünyanın müxtəlif universitet və klinikalarından gəlmiş professorlar referent və trener qismində iştirak ediblər.

   Yerli və xarici mütəxəssislərin sədrliyi ilə plenar iclaslarla davam edən tədbirdə radiologiya, ginekologiya, ultrasonoqrafiya və cərrahiyyənin aktual problemlərinə həsr olunmuş məruzələri dinlənilib, müzakirə olunan mövzular ətrafında fikir mübadilələri aparılıb.

   Tədbirin ikinci günü Azərbaycan, Türkiyə, Ukrayna, Özbəkistan və Dağıstandan gəlmiş 150-ə yaxın iştirakçı üçün laparoskopik və ümumi cərrahiyyə, endoskopiya, ultrasonoqrafiya, radiologiya, ginekologiya, kardiopulmonar reanimasiya üzrə kurslar keçirilib. Təlimlərdə Avropada həkimlərin davamlı tibb təhsili və ixtisasartırması məqsədilə tətbiq olunan ən müasir proqramlardan və xüsusi modellərdən istifadə edilib.

   Tədbir əsnasında tibb bacıları üçün də iki səviyyədə praktik vərdiş seminarları təşkil olunub. Xatırladaq ki, tədbir Səhiyyə Nazirliyi tərəfindən də akkreditasiya olunaraq 18 Davamlı Tibbi Təhsil balı ilə qiymətləndirilib. Tədbirin sonunda iştirakçılara beynəlxalq sertifikatlar təqdim olunub.