30.09.2016-cı il tarixində Səhiyyə Nazirliyi Sertifikasiya Komissiyasında KİV nümayəndələri ilə görüş keçirilmişdir. Tədbirdə qeyd edilmişdir ki, səhiyyə sistemində əhalinin tibbi təminatının keyfiyyətinin yaxşılaşdırılması, savadlı kadr potensialının formalaşdırılması istiqamətində məqsədyönlü fəaliyyət aparılır. Son illərdə səhiyyə islahatlarının aparılması, müasir tibb ocaqlarının istifadəyə verilməsi və onların yüksək texnologiyalı tibbi avadanlıqlarla təchiz edilməsi tibb müəssisələrinin və orada çalışan tibb personalının bilik və bacarığının müasir standartlara uyğunlaşdırılmasına xüsusi zərurət yaradır.

   Səhiyyə Nazirliyi Sertifikasiya Komissiyası müasir informasiya texnologiyalarından istifadə edərək səhiyyə müəssisələrində çalışan və praktik tibb və ya əczaçılıq fəaliyyəti ilə məşğul olan səhiyyə mütəxəssislərinin sertifikasiyası prosesini həyata keçirən və tənzimləyən, onların peşəkarlıq səviyyəsini və peşə yararlığını yoxlayan qurumdur.

  Komissiyanın fəaliyyət istiqamətlərinə səhiyyə mütəxəssislərinin sertifikasiyası prosesini həyata keçirmək, tənzimləmək, inkişaf etdirmək və səhiyyə mütəxəssislərinin peşəkarlıq səviyyəsini və peşə yararlılığını yoxlamaq daxildir. Sertifikasiya qanunvericiliyə uyğun aşkarlıq şəraitdə, şəffaf üsullarla həyata keçirir.

   Komissiya sertifikasiyadan keçmək üçün səhiyyə mütəxəssisləri tərəfindən təqdim olunan sənədləri qəbul edir, onların tamlığını, düzgünlüyünü və Azərbaycan Respublikasında tibb və əczaçılıq fəaliyyəti ilə məşğul olmaq hüququ olan şəxslərin dövlət reyestrinin tələblərinə uyğun olmasını yoxlayıb, ərizələrin qəbulu jurnalında qeydiyyat aparır.

   Azərbaycan Respublikasında praktik tibb və ya əczaçılıq fəaliyyəti ilə məşğul olan, ali və orta ixtisas təhsilinə malik, müvafiq qaydada dövri ixtisasartırma kurslarını keçmiş səhiyyə mütəxəssislərinin peşəkarlıq səviyyəsinin və peşə yararlığının yoxlanılması məqsədi ilə həmin işçilər beş ildə bir dəfə sertifikasiyaya cəlb edilirlər.

   2011-ci ilin yanvar ayından ali tibb mütəxəssislərinin, 2012-ci ildən isə orta tibb işçilərinin sertifikasiya prosesi aparılır. Bu illər ərzində sertifikasiya prosesini daha da təkmilləşdirmək, şəffaflığı daha da artırmaq məqsədi ilə Azərbaycan Respublikasının Nazirlər Kabineti 1 dekabr 2015-ci il tarixli 371 nömrəli Qərarı ilə “Praktik tibb və ya əczaçılıq fəaliyyəti ilə məşğul olan şəxslərin (işçilərin) sertifikasiyası Qaydası”nda sənəd qəbulunda və imtahan prosedurasında müəyyən dəyişikliklər etmişdir. Sertifikasiya imtahanının keçirilməsinə 30 gün qalmış imtahana cəlb olunan hər bir şəxs Sertifikasiya Şurasının internet səhifəsində bu barədə məlumat yerləşdirmək yolu ilə və imtahana cəlb olunan şəxslərin təqdim etdikləri mobil telefon nömrələrinə sms göndərməklə, yaxud elektron poçt ünvanlarına yazmaqla məlumatlandırılır. Qaydaya əsasən sertifikasiya imtahanının sualları iki hissəyə (test və klinik tapşırıq) bölünür. İmtahan suallarının test hissəsi informasiya texnologiyaları və xüsusi optik cihazlar vasitəsilə oxunan və 60 sualdan ibarət olan sual vərəqəsində qeyd olunur.

  İmtahan suallarının klinik tapşırıq hissəsi sertifikasiyaya cəlb edilən səhiyyə mütəxəssisinin ixtisasına aid, habelə onun praktiki bilik səviyyəsini və peşə vərdişlərini müəyyən edən 5 klinik tapşırıqdan ibarət olur və sual vərəqəsində qeyd olunur. İmtahan suallarının test hissəsi üzrə 40 və ya daha çox, klinik tapşırıq hissəsi üzrə isə 16 və ya daha çox bal toplamış şəxslər sertifikasiyadan keçmiş hesab olunurlar.

   Sertifikasiyadan keçən şəxslərə sertifikasiya imtahanının bitdiyi gündən 5 iş günü müddətində sertifikasiya şəhadətnaməsi verilir, həmçinin şəhadətnamənin surəti onların təqdim etdikləri elektron poçt ünvanına göndərilir.

   Tabeliyindən və mülkiyyət formasından asılı olmayaraq, səhiyyə müəssisələrində çalışan və özəl praktik tibb və ya əczaçılıq fəaliyyəti ilə məşğul olan səhiyyə mütəxəssislərinin sertifikasiyası Azərbaycan Respublikasının Səhiyyə Nazirliyi tərəfindən həyata keçirilir. Qaydaya əsasən təhsilini təsdiq edən sənədin və ixtisasını qanunvericiliyə uyğun olaraq dəyişdirmiş səhiyyə mütəxəssisləri yeni ixtisasını təsdiq edən sənədin verildiyi gündən beş il müddətində sertifikasiyadan keçmirlər.

   Belə ki, Səhiyyə Nazirliyinin tabeliyindəki səhiyyə müəssiələrində çalışan tibb mütəxəssisləri kimi, özəl praktik tibb və ya əczaçılıq fəaliyyəti ilə məşğul olan tibb mütəxəssisləri, eləcə də digər nazirliklərin tabeliyində olan səhiyyə müəssisələrində işləyən tibb mütəxəssisləri də sertifikasiyadan keçirlər.

   Məlumat üçün bildirilmişdir ki, elmi tədqiqat institutlarında çalışan və yalnız elmi işlə məşğul olan mütəxəssislər sertifikasiyaya cəlb edilmirlər.

  Sertifikasiyadan qanunvericiliyə uyğun olaraq keçməyən işçilərin praktik tibb və ya əczaçılıq fəaliyyətinə buraxılmasına yol verilmir.

   Qeyd edilmişdir ki, bu günə kimi 26 860 həkimə və 38 000 orta tibb işçisinə imtahana buraxılış vərəqəsi verilib. 22 sentyabr 2016-cı il tarixinə olan məlumata görə 22 614 ali və 32 272 orta tibb işçisinə Sertifikasiya Şəhadətnaməsi verilib. İmtahanlardan keçə bilməyən və yaxud müxtəlif səbəblərdən imtahana gəlməyənlər sertifikasiya prosesində iştirak edən ali tibb təhsilli mütəxəssislərin, təxminən 15-18%-ni, orta tibb işçilərinin isə 15%-ni təşkil edir.