Hər il 10 oktyabr tarixi Ümumdünya Psixi Sağlamlıq Günü kimi qeyd edilir. Bu gün 1992-ci ildən Ümumdünya Psixi Sağlamlıq Federasiyasının təşəbbüsü ilə BMT-də qeyd olunan beynəlxalq günlər siyahısına daxil edilib. Ümumdünya Səhiyyə Təşkilatının (ÜST) məlumatına görə, hazırda dünyada 450 milyondan çox insan psixi xəstəlikdən əziyyət çəkir.

  Psixi pozuntular infeksion və qeyri-infeksion xəstəliklərin inkişafının risk amillərinə aid edilir. Bu il Ümumdünya Psixi Sağlamlıq Günü  "Depressiya:Gəl söhbət edək"  şüarı altında qeyd olunacaqdır. Ümumdünya Psixi Sağlamlıq Gününün məqsədi psixi sağlamlıq probleminə yanaşmada dünya əhalisinin məlumatlılıq səviyyəsini yüksəltmək, psixi sağlamlığın möhkəmləndirilməsi istiqamətində qlobal səviyyədə daha çox açıq müzakirələr aparmaq və eləcə də psixoloji xəstəliklər, psixi pozğunluğun profilaktikası və müalicə xidmətlərinə sərmayə yatırılmasını stimullaşdırmaqdan ibarətdir.

  Psixi pozuntudan əziyyət çəkən vətəndaşların hüquq və azadlıqlarının qorunması Azərbaycanda da prioritetdir. Hazırda ölkəmizdə psixiatrik yardım 2001-ci il sentyabrın 3-də qəbul olunmuş “Psixiatrik yardım haqqında” Azərbaycan Respublikasının Qanunu ilə tənzimlənir.